Hypnose Moderne !!

الاطار الزماني : الثامنة و النصف صباحا
الاطار المكاني : مدخل احدى الادارات التونسية..
موظف 1 :صباح الخير خويا
تفرجت البارح في البارتيي ؟ شفت هاك البونطو و هاك النقشة ؟
موظف 2 :باهيش توة هذا كلام يا صاحبي ؟
بالطبيعة الجمعية ديما مشيختنا
***
العاشرة صباحا..
في احد البيروات المتركنة :
موظف 3 : اسمع اسمع..
حط بارتي الترجي 2 باز
و الا تعرفشي كيفاش
حط دوبل x 2
موظف 4 :
لتوا حاطط 3 دوابل
الحسبة بدات تطلع اما ميسالش
المهم الكورة تشيخنا
و الجمعية ما تجبدش بيا..
***
الاطار الزماني : منتصف النهار..
الاطار المكاني : فاست فود امام احدى الجامعات..
طالب 1 : بالرسمي غدوة عنا ايكزامان ؟
طالب 2 : يا ولدي اما ايكزامان..الليلة بارتيي البارصا كونتر الميلان ما نفلتهاش..
طالب 1 : الليلة صار هو الماتش ؟ بفف ما يتفلتش برجولية.. تعدالي تو نمشيو مع بعضنا للقهوة
دقيقة بربي البورتابل يvبري..
.... ...
الو ؟ وي عزيزتي ؟
...
الليلة ؟
.....
ديزولي ... ما انجمش الليلة عندي برررشة قراية
بون نوي..a دومان بييz..
***
الاطار الزماني : الخامسة مساء..
الاطار المكاني : مقهى شعبي..
حريف : يا محمد
يا صالح يا ولدي يا...يا قهواجي
القهواجي :
وي خويا تفضل ؟
الحريف : باش تعديو البارتي الليلة ؟
القهواجي : بالطبيعة خويا
اسمع مالا باش نوصيك من توة خليلي كرسي مقابل الeكرون
باهي نعمل عليك ؟
القهواجي :
باهي صاحبي..اما ايجا بكري ماك تعرف الزحمة..
الحريف :تي تهنى يا ولدي
نوصل بقضية فيسع تو نبعثها مع ولدي للدار و نرجع..
***
الاطارالزماني : الثامنة و النصف ليلا..
الاطار المكاني : بيت الصالة في دار مواطن تونسي
المرا تعيط من الكوجينة :
يا مهدي..يا مهدي..
مهدي : وي ماما ؟
تي ايجا طيش الزبلة !!
مهدي :تي شبيكم تتفكروها كان توة ؟
 تو نطيشها مباعد خلي نتفرج في البارتي توة..
-الطفلة في يدها التليكوموند تتفرج في مسلسل مصري: اما ماتش ؟
البو داخل للدار عرقو شرتلة و في يدو جريدة  و هو يجري باش ما يفلتش الدخلة : ايا سيب التيليكوموند و برا اقرا دروسك البارتي باش تبدا و انتي السومان بلوكي عالابواب..
***
الاطار الزماني : العاشرة ليلا
الاطار المكاني : ستوديو طالب ..
الطالب 1 في يدو منشور و قدامو كتاب ملخص عن الافكار الشيوعية..
يتلفت لصاحبو : اسمع غدوة عنا gراV في الفاك متاعنا
باش تجي معايا و الا لأ ؟
الطالب 2 : gراv على شنوة زادة ؟
الطالب1 : يا ولدي وين عايش يخي ؟
ما فيبالكش باللي صاير في الدنيا ؟
البلاد باش تتقلب و الاسوام طايرة في السماء..و ... و...
و المفواضات متعطلة بسبب..و ...
الطالب2 : يا ولدي يزيني من الحس قداش عندك جوجمة زايدة
يخي باش تبدل حاجة انتي و الا اصحابك
تي بطرف ماتراك تو يفرقوكم كيالعادة
اخطاني من المشاكل برجولية
هانا عايشين خير من الناس
و زيد برجولية...غدوة هابط للبارك باش نقص ابونمون..الجمعية تكور نهار الاحد و ما نحبش نفلت البارتي..
الطالب 1 : نورمال نتي ؟
وين القضية و وين القومية و الوعي و ..
الطالب 2 : اخطانا صاحبي و احمد ربي غلي عطاهولك و شد ببوشتك و اسكت
لا تبيتنا في بوفردة
هاك عايش لاباس اش تحب ؟

بقلم العضو Tony Montana Jr  بفوروم كوورة